កោះកុង៖ ព្រឹកថ្ងៃសុក្រ ទី០១ ខែកញ្ញា ឆ្នាំ២០២៣ នៅបញ្ជាការដ្ឋានកងរាជអាវុធហត្ថខេត្តកោះកុង លោក ឧត្តមសេនីយ៍ឯក ហុង វិណុល មេបញ្ជាការរង កងរាជអាវុធហត្ថលើផ្ទៃប្រទេស បានអញ្ជើញជាអធិបតីក្នុងពិធីផ្សព្វផ្សាយពង្រឹងផែននគរបាលយុត្តិធម៌ ជំនាញស្រាវជ្រាវព័ត៌មានសន្តិសុខ និងស្រាវជ្រាវបង្ក្រាបបទល្មើស ដោយមានការចូលរួមពីលោក ស្នងការ ស្នងការរង នាយការិយាល័យ និងលោក មេបញ្ជាការ មេបញ្ជាការង នាយ នាយរងអាវុធហត្ថខេត្តកោះកុងដែលមានការពាក់ព័ន្ធ។

ឯកឧត្ដម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស និងនាយទាហាននៃកងរាជអាវុធហត្ថ បានអញ្ជើញចូលរួមក្នុងពិធីសំណេះសំណាលជាមួយនាយទាហាន នៃកងយោធពលខេមរភូមិន្ទ ក្រោមអធិបតីភាពដ៏ខ្ពង់ខ្ពស់ សម្ដេចពិជ័យសេនា ទៀ បាញ់ ឧត្ដមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា ពិធីនេះប្រព្រឹត្តិទៅនារសៀលថ្ងៃព្រហស្បតិ៍ ទី៣១ ខែសីហា ឆ្នាំ២០២៣ នៅទីស្តីការក្រសួងការពារជាតិ។

ត្បូងឃ្មុំ៖ នៅវេលាម៉ោង ១០:០០ នាទី ព្រឹកថ្ងៃពុធ ទី៣០ ខែសីហាឆ្នាំ២០២៣ ដោយមានបទបញ្ជា ពីលោកឧត្តមសេនីយត្រី រ័ត្ន ចាន់ណា មេបញ្ជាការកងរាជអាវុធហត្ថខេត្តត្បូងឃ្មុំ លោកវរសេនីយ៍ត្រី សុខ ប៊ុនឡុង មេបញ្ជាការកងរាជអាវុធហត្ថក្រុងសួង ដឹកនាំកម្លាំងចូលរួមអន្តរាគមន៍ជួយពន្លត់ករណីអគ្គីភ័យ(ភ្លើងឆេះផ្ទះ) នៅចំណុចភូមិជ្រួយ សង្កាត់វិហារលួង ក្រុងសួង មូលហេតុបណ្តាលមកពីម្ចាស់ផ្ទះអុជទៀនធូបសែនក្បាលទឹកទុកចោល។ ផ្ទះឈើ១ខ្នង ទំហំ ៧X១២ ម៉ែត្រប្រក់ក្បឿងជញ្ជាំងក្ដារត្រូវបានខូចខាតទាំងស្រុង និងទ្រព្យសម្បត្តិមូយចំនួនទៀត តែដោយមានការជួយសង្គ្រោះទាន់ពេលវេលាគឺមិនបានឆាបឆេះដល់ផ្ទះប្រជាពលរដ្ឋផ្សេងទៀតទេ។

បាត់ដំបង៖ យោងតាមបទបញ្ជារបស់លោកឧត្តមសេនីយ៍ត្រី ហែម វុទ្ធី មេបញ្ជាការកងរាជអាវុធហត្ថខេត្តបាត់ដំបង នៅវេលាម៉ោង១១ :៣០នាទី ថ្ងៃទី២៩ ខែសីហា ឆ្នាំ២០២៣ លោក វរសេនីយ៍ទោ សូ ឌី ប្រធានមន្ទីរស្រាវជ្រាវ និងបង្រ្កាបបទល្មើស បានដឹកនាំកម្លាំងជំនាញ ចុះបង្រ្កាបករណី ជួញដូរដោយខុសច្បាប់នូវសារធាតុញៀន នៅភូមិបឹងព្រីង ឃុំព្រៃតូច ស្រុកមោងឬស្សី ខេត្តបាត់ដំបង បានឃាត់ខ្លួនជនសង្ស័យចំនួន០២នាក់ ពាក់ព័ន្ធករណីគ្រឿងញៀនង និងចាប់យកវត្ថុតាងពាក់ព័ន្ធ។ បច្ចុប្បន្នមន្ត្រីជំនាញកំពុងបន្តនីតិវិធី។

ឧត្តរមានជ័យ៖ ដោយទទួលបានការអនុញ្ញាតពីលោក ឧត្តមសេនីយ៍ត្រី លី ដារិទ្ធ មេបញ្ជាការ កងរាជអាវុធហត្ថខេត្តឧត្តរមានជ័យ នៅថ្ងៃទី៣០ ខែសីហា ឆ្នាំ២០២៣ លោក វរសេនីយ៍ឯក សៀ ថុន នាយសេនាធិការ កងរាជអាវុធហត្ថខេត្តឧត្តរមានជ័យ បានប្រជុំត្រួតពិនិត្យការអនុវត្តតួនាទី ភារកិច្ច ការងារកងរាជអាវុធហត្ថ ដោយមានការចូលរួមពី លោក នាយសេនាធិការរង ប្រធាន អនុប្រធានមន្ទីរ និងនាយការិយាល័យជំនាញ។

នៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ ព្រឹកថ្ងៃអង្គារ ទី២៩ ខែសីហា ឆ្នាំ២០២៣ លោកវរសេនីយ៍ត្រី ជឹក ជឿន នាយផ្នែកអត្តសញ្ញាណប័ណ្ណ ការិយាល័យបុគ្គលិក ស្នងការដ្ឋានកសាងកម្លាំង កងរាជអាវុធហត្ថលើផ្ទៃប្រទេស និងសហការីបានអញ្ជើញចុះប្រគល់អត្តសញ្ញាណប័ណ្ណកងយោធពលខេមរភូមិន្ទ ជូនដល់សិក្ខាកាមជំនាន់ទី៤៦ ចំនួនសរុប ១០០០នាក់។

ភ្នំពេញ៖ ព្រឹកថ្ងៃពុធ ទី៣០ ខែសីហា ឆ្នាំ២០២៣ នៅសាលប្រជុំវិទ្យាស្ថានកងរាជអាវុធហត្ថ(កំបូល) បានប្រជុំត្រួតពិនិត្យ បូកសរុបរបាយការណ៍ការងារវិទ្យាស្ថាន ក្រោមអធិបតីភាពលោក ឧត្ដមសេនីយ៍ទោ តាត ចន្ថា នាយកវិទ្យាស្ថានកងរាជអាវុធហត្ថ(កំបូល) ដោយមានសមាសភាពចូលរួម នាយលេខាធិការដ្ឋាន ប្រធានមន្ទីរទាំង៥ ប្រធានក្រុមស្រាវជ្រាវវិជ្ជាសាស្ត្រហ្វឹកហ្វឺន ប្រធានក្រុមយោធាចារ្យ ការិយាល័យហិរញ្ញវត្ថុ និងបុគ្គលិកដែលមានការពាក់ព័ន្ធ។