ដោយអនុវត្តតាមបទបញ្ជាយ៉ាងម៉ឺងម៉ាត់ របស់លោក ឧត្តមសេនីយ៍ត្រី ហ៊ត សីហា មេបញ្ជាការកងរាជអាវុធហត្ថខេត្តកែប កម្លាំងអាវុធហត្ថខេត្ត និងតាមបណ្ដាមូលដ្ឋានក្រុង/ស្រុក បានធ្វើការល្បាតដើម្បីការពារសន្តិសុខ រក្សាសណ្តាប់ធ្នាប់ និងសុវត្ថិភាពជូនប្រជាពលរដ្ឋក្នុងភូមិសាស្រ្តខេត្តកែប។  

ត្បូងឃ្មុំ៖ នៅបញ្ជាការដ្ឋានកងរាជអាវុធហត្ថខេត្តត្បូងឃ្មុំ ព្រឹកថ្ងៃអាទិត្យ ទី២០ ខែសីហា  ឆ្នាំ២០២៣ លោក ឧត្ដមសេនីយ៍ ត្រី រ័ត្ន ចាន់ណា មេបញ្ជាការ កងរាជអាវុធហត្ថខេត្តត្បូងឃ្មុំ បានអញ្ជើញប្រជុំជួរដើម្បីត្រួតពិនិត្យកម្លាំងត្រៀមអន្តរាគមន៍ និងមធ្យោបាយសម្ភារបរិក្ខារបំពាក់ ដោយមាននាយទាហាន នាយទាហានរងនៃកងរាជអាវុធហត្ថខេត្តចូលរួមចំនួន ៩៧នាក់។

កោះកុង៖ នៅវេលាម៉ោង១៥:៣០នាទី ថ្ងៃទី១៧ ខែសីហា ឆ្នាំ២០២៣ កម្លាំងជំនាញកងរាជអាវុធហត្ថខេត្ត និងកម្លាំងមូលដ្ឋានកងរាជអាវុធហត្ថស្រុកមណ្ឌលសីមា ខេត្តកោះកុង ដឹកនាំដោយលោក វរសេនីយ៍ទោ នួន វុត្ថា មេបញ្ជាការរងទទួលការងារស្រាវជ្រាវ និងបង្ក្រាបបទល្មើស បានចុះបង្ក្រាបករណីជួញដូរ ឬប្រើប្រាស់ដោយខុសច្បាប់នូវសារធាតុញៀននៅចំណុចដីថ្មី ស្ថិតក្នុងភូមិនាងកុក ឃុំប៉ាក់ខ្លង ស្រុកមណ្ឌលសីមា ខេត្តកោះកុងដោយបានឃាត់ខ្លួនជនសង្ស័យចំនួន ០៥នាក់(ប្រុស) និងចាប់យកវត្ថុតាងម្សៅក្រាមពណ៌សថ្លាសង្ស័យជាសារធាតុញៀនចំនួន២កញ្ចប់ធំ ១៣កញ្ចប់តូច, ទូរស័ព្ទដៃចំនួន០៣គ្រឿង, ម៉ូតូចំនួន១គ្រឿង។ បច្ចុប្បន្នកម្លាំងជំនាញ កំពុងកសាងសំណុំរឿងតាមនីតិវិធី៕

ព្រៃវែង៖ នៅបញ្ជាការដ្ឋានកងរាជអាវុធហត្ថខេត្តព្រៃវែង រសៀលថ្ងៃទី១៨ ខែសីហា ឆ្នំា២០២៣ លោក ឧត្តមសេនីយ៍ត្រី ឈួន គឹមសាន មេបញ្ជាការ កងរាជអាវុធហត្ថខេត្តព្រៃវែង បានអញ្ជើញដឹកនាំកិច្ចប្រជុំត្រួតពិនិត្យរបាយការណ៍ ការងារសហប្រតិបត្តិការ ការពារព្រំដែន រវាងកងទ័ពការពារព្រំដែនខេត្តតៃនិញ ប្រទេសវៀតណាម ជាមួយបញ្ជាការដ្ឋានកងរាជអាវុធហត្ថខេត្ត និងកំណត់ហេតុកិច្ចប្រជុំរវាងបញ្ជាការដ្ឋានកងរាជអាវុធហត្ថខេត្តព្រៃវែងនៃព្រះរាជាណាចក្រកម្ពុជា ជាមួយបញ្ជាការដ្ឋានកងទ័ពការពារព្រំដែនខេត្តតៃនិញនៃសាធារណរដ្ឋសង្គមនិយមវៀតណាម។

តាកែវ៖ នៅព្រឹកថ្ងៃសុក្រ ទី១៨ ខែសីហា ឆ្នាំ២០២៣ លោកឧត្ដមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ បាននាំយកទៀនព្រះវស្សា និងបច្ច័យព្រមទាំង គ្រឿងឧបភោគបរិភោគមួយចំនួនប្រគេនដល់ព្រះសង្ឃគង់ចាំព្រះវស្សា នៅវត្តភ្នំ (ហៅវត្តជីតាពេជ្រ) ស្ថិតនៅឃុំកំពែង ស្រុកគីរីវង់ ខេត្តតាកែវ ដោយទេយ្យទានទាំងនោះរួមមានទៀន០១គូរ, អង្ករ០៣បាវ, ទឹកត្រី០៣កេស, ទឹកស៊ីអ៊ីវ០៣កេស, ត្រីខ០១កេសធំ, ទឹកដោះគោ០១កេសធំ, មីម៉ាម៉ា០១កេសធំ , ទឹកក្រូច០៥កេស, ទឹកបរិសុទ្ធ០៥កេស និងបច្ច័យ ១,១០០,០០០ រៀល(មួយលានដប់ម៉ឺនរៀល)។

កំពង់ឆ្នាំង៖ នៅវេលាម៉ោង០៨:៣០នាទីព្រឹកថ្ងៃទី១៨ ខែសីហា ឆ្នាំ២០២៣ កម្លាំងមូលដ្ឋានកងរាជអាវុធហត្ថស្រុកជលគិរី ខេត្តកំពង់ឆ្នាំង បានសហការជាមួយកម្លាំងចម្រុះចុះបង្ក្រាបបទល្មើសនេសាទ នៅចំណុចព្រែកតាសួសស្ថិតនៅក្នុងភូមិក្បាលកន្លង់ ឃុំពាមឆ្កោក ស្រុកជលគិរី ខេត្តកំពង់ឆ្នាំង ដោយបានរុះរើរបាំងស្បៃមុង១៨កន្លែង ប្រវែង ៥០០ម៉ែត្រ, លូស្បៃមុង១៣ មាត់, បង្គោលចម្រុះ ចំនួន ២០០ ដើម, ចាក់លែងកូនត្រីចម្រុះចំនួនប្រមាណ១៥០គីឡូក្រាម ចំណែកសម្ភារត្រូវបានបំផ្លាញចោលនៅនឹងកន្លែង។

យោងតាមបទបញ្ជារបស់លោកឧត្តមសេនីយ៍ត្រី ហែម វុទ្ធី មេបញ្ជាការកងរាជអាវុធហត្ថខេត្តបាត់ដំបង នៅវេលាម៉ោង១៥ :៣០នាទី ថ្ងៃទី១៧ ខែសីហា ឆ្នាំ២០២៣ កម្លាំងអាវុធហត្ថខេត្តដឹកនាំដោយលោក វរសេនីយ៍ទោ សូ ឌី ប្រធានមន្ទីរស្រាវជ្រាវ និងបង្រ្កាបបទល្មើសកងរាជអាវុធហត្ថខេត្តបាត់ដំបង បានដឹកនាំកម្លាំងជំនាញចុះបង្រ្កាបករណី ជួញដូរឬប្រើប្រាស់ដោយខុសច្បាប់នូវសារធាតុញៀន នៅភូមិវត្តលៀប សង្កាត់ចំការសំរោង ក្រុងបាត់ដំបង ខេត្តបាត់ដំបង ដោយបានឃាត់ខ្លួនជនសង្ស័យម្នាក់ឈ្មោះ រ៉េត ពិសិដ្ឋ ភេទប្រុស អាយុ ២៥ឆ្នាំ មុខរបរគ្មាន មានទីលំនៅភូមិថ្កូវ សង្កាត់ក្តុលដូនទាវ…

ភ្នំពេញ៖ ព្រឹកថ្ងៃសុក្រ ទី១៨ ខែសីហា  ឆ្នាំ២០២៣ នៅសាលប្រជុំវិទ្យាស្ថានកងរាជអាវុធហត្ថ(កំបូល) បានធ្វើការប្រជុំត្រួតពិនិត្យបូកសរុបរបាយការណ៍ការងារ ក្រោមអធិបតីភាព លោក ឧត្ដមសេនីយ៍ទោ តាត ចន្ថា នាយកវិទ្យាស្ថានកងរាជអាវុធហត្ថ(កំបូល) ដោយមានសមាសភាពចូលរួម នាយលេខាធិការដ្ឋាន ប្រធានមន្ទីរទាំង៥ ប្រធានក្រុមស្រាវជ្រាវវិជ្ជាសាស្ត្រហ្វឹកហ្វឺន ប្រធានក្រុមយោធាចារ្យ ការិយាល័យហិរញ្ញវត្ថុ និងបុគ្គលិកដែលមានការពាក់ព័ន្ធ។

ព្រះសីហនុ៖ អនុវត្តបទបញ្ជាយ៉ាងម៉ឹងម៉ាត់របស់ លោក ឧត្តមសេនីយ៍ត្រី ហេង ប៊ុនទី មេបញ្ជាការ កងរាជអាវុធហត្ថខេត្តព្រះសីហនុ កម្លាំងកងរាជអាវុធហត្ថខេត្ត រួមនឹងបណ្តាមូលដ្ឋានកងរាជអាវុធហត្ថក្រុង-ស្រុក ស្នាក់ការសន្តិសុខ ចេញល្បាតចល័តតាមភូមិសាស្ត្រ ដើម្បីការពារសន្តិសុខ រក្សាសុវត្ថិភាព ជូនដល់ភ្ញៀវទេសចរជាតិ-អន្តរជាតិ និងបងប្អូនប្រជាពលរដ្ឋក្នុងមូលដ្ឋាន។